ພຣະຫລັກແກ້ວມະວໍຣະຍານາທິບໍດີ (ຍາທ່ານໃຫຍ່ ມະຫາເຫວດ ມະເສໄນ) ຮອງປະທານ ສູນກາງ ອົງການພຸດທະສາສະໜາສຳພັນລາວ ພ້ອມດ້ວຍພຣະສົງຈຳນວນກວ່າ 38 ຮູບ ເມດຕາ ຮ່ວມເດີນທາງ ໄປຢ້ຽມຊົມ ການຈັດວາງ ສະແດງຮູບພາບ ແລະ ຮັບຊົມສາລະຄະດີລຳລຶກປະຫວັດສາດ ທີ່ຫໍມູນເຊື້ອ ສູນກາງແນວລາວສ້າງຊາດ.
ທັນທີທີ່ຄະນະສົງເດີນທາງເຖີງຫໍມູນເຊື້ອ ເຈົ້າພະນັກງານກໍ່ເຮັດຫນ້າທີຕ້ອນຮັບຄະນະສົງເປັນຢ່າງດີ ພ້ອມມັກຄຸເທດນຳທາງຢ້ຽມຊົມທັດສະນະສຶກສາແຕ່ລະລາຍການ ການຈັດວາງສະແດງ ທັງຊັ້ນຫນື່ງ ແລະ ຊັ້ນສອງ ພ້ອມການຮັບຊົມສາລະຄະດີລຳລຶກປະຫວັດສາດປະມານເຄີ່ງຊົ່ວໂມງ.
ຖືເປັນຄັ້ງປະຫວັດສາດທໍາອິດຂອງແນວລາວສ້າງຊາດ ທີ່ໄດ້ມີຫໍມູນເຊື້ອເພື່ອວາງສະແດງຮູບພາບ, ຂໍ້ມູນ, ນິຕິກໍາ ວັດຖຸພັນ, ເພື່ອສ້າງໃຫ້ເປັນບ່ອນທັດສະນະສຶກສາອົບຮົມ ລູກຫຼານເຍົາວະຊົນຊາວຫນຸ່ມ ນັກຮຽນນັກສຶກສາ, ພະນັກງານ-ລັດຖະກອນ, ປະຊາຊົນລາວບັນດາເຜົ່າ ແລະ ຄົນເຊື້ອສາຍລາວທີ່ອາໄສຢູ່ຕ່າງປະເທດ.
