ຕົ້ນໂພທີ່ນຳມາປູກຈາກພຸດທະຄະຍາ ປະເທດອິນເດຍ ອອກໃບດົກໜາ ສວຍງາມ ໜ້າອັດສະຈັນ

ຕົ້ນພຣະສີມະຫາໂພ (ບາລີ: ໂພທິຣຸກຂະ) ເປັນຕົ້ນໂພທີ່ພຣະໂຄດົມພຸດທະເຈົ້າເຄີຍປະທັບນັ່ງ ແລະ ຕັດສະຮູ້ ອະນຸຕະຣະສັມມາສັມໂພທິຍານ ດັ່ງທີ່ປະກົດໃນຄັມພີທາງພຸດທະສາສະໜາວ່າ ຕົ້ນໂພນັ້ນປຽບເຫມືອນກັບເຈດີຢ່າງຫນື່ງໃນພຸດທະສາສະໜາ ເຮັດໃຫ້ຕົ້ນໂພກາຍເປັນພັນໄມ້ທີ່ເປັນທີ່ເຄົາລົບນັບຖືຂອງຊາວພຸດສະເຫມີມານັບແຕ່ສະໄຫມພຸດທະການ ຕົ້ນໂພໃນພຸດທະປະຫວັດສອງຕົ້ນ ຄື ຕົ້ນພຣະສີມະຫາໂພ ທີ່ ພຸດທະຄະຍາ ສະຖານທີ່ຕັດສະຮູ້ ແລະ ອະນັນທະໂພ ທີ່ ວັດເຊດຕະວັນມະຫາວິຫານ ເຊີ່ງຍັງຄົງຢືນຕົ້ນຢູ່ມາຈົນເຖີງປັດຈຸບັນ.ຄຳວ່າຕົ້ນສີມະຫາໂພນັ້ນ ອາດຈະໝາຍເຖີງຕົ້ນທີ່ຢູ່ພຸດທະຄະຍາ,ຕົ້ນໂພທີ່ສືບມາຈາກເບັຍ (ຫນໍ)ຕັດສະຮູ້ທີ່ພຸດທະຄະຍາ ຫຼື ອາດຈະເປັນຕົ້ນໂພທີ່ເຮົາເຫັນຕາມວັດຕ່າງໆກໍ່ໄດ້.

ໃນປະເທດລາວ ມີຕົ້ນສີມະຫາໂພ ຕາມວັດຕ່າງໆເກືອບຈະທຸກວັດ ແຕ່ມີບໍ່ເທົ່າໄດ່ວັດທີ່ເຮົາຈະຮູ້ແທ້ວ່າ ຕົ້ນສີມະຫາໂພນັ້ນມີທີ່ມາທີໄປແນວໃດ່.ແຕ່ແນ່ນອນວ່າ ການເກີດຂື້ນຂອງຕົ້ນໂພໃນປະເທດລາວຕາມວັດຕ່າງໆ ຈະຕ້ອງມີຄົນນຳເບັຍຈາກພຸດທະຄະຍາ ຫຼື ລັງກາ ມາປູກໄວ້ໃນຍຸກທີ່ພຣະພຸດທະສາສະນາເລີ່ມເຂົ້າມາໃນລາວຢ່າງແນ່ນອນ.

ໃນປະເທດລາວ ຕົ້ນໂພ ເປັນທີ່ເຄົາລົບບູຊາ ແລະ ຖືເປັນຕົ້ນໄມ້ສັກສິດ ຂະນາດຖ້າຈຳເປັນຕ້ອງຕັດຕົ້ນໂພ ກໍ່ວ່າເປັນບາບ. ດັ່ງນັ້ນ ໃນບາງພື້ນທີ່ ເມື່ອ ຍາມຈຳເປັນທີ່ຈະຕ້ອງຕັດຕົ້ນໂພ ຈື່ງຕ້ອງ ແຕ່ງຂັນ 5 ຫຣື ຈູດທູບທຽນ ໄຫວ້ພຣະ ລະນຶກເຖີງພຣະຣັດຕະນະໄຕຣ ຄາລະວະ ແລະ ບອກເຫດຜົນທີ່ເຮົາຈະຕ້ອງຕັດຕົ້ນໂພກ່ອນ.ອີກຢ່າງຫນື່ງ ເພາະຊາວພຸດເຊື່ອວ່າ ຕົ້ນໄມ້ໃຫຍ່ ມີເທວະດາອາໃສ່ຢູ່. ແຕ່ຖ້າເປັນຕົ້ນໂພນ້ອຍ ທີ່ເກີດຕາມບ້ານເຮືອນ ທີ່ຍັງບໍ່ໄດ້ເຮັດພິທີກັມອຸປະໂລກຂື້ນວ່າເປັນຂອງຜູ້ໃດ່ ເຮົາກໍ່ສາມາດຖອນຖີ້ມໄດ້ ຫຼື ນຳໄປປູກໄວ້ຕາມສະຖານທີ່ ທີ່ເຫມາະສົມ.

ນອກຈາກນີ້ ຕົ້ນໂພ ສຳຫລັບຊາວລ້ານນາ ໃນອະດີດ ຫລື ໄຕລື້ ຕາມພາກເຫນືອຂອງປະເທດລາວໃນປັດຈຸບັນ ກໍ່ຍັງຖືວ່າຕົ້ນໂພເປັນຕົ້ນໄມ້ສັກສິດສາມາດຊ່ວຍກຳຈັດປັດເປົ່າຄວາມທຸກໄດ້ ຈື່ງມີປະເພນີຄ້ຳໂພ ແລະ ເຄື່ອງປະກອບພິທີກຳຕ່າງໆ ເຊີ່ງຜູກຄະຕິເລື່ອງຄວາມເຊື່ອສິ່ງສັກສິດ ເຊີ່ງບໍ່ແມ່ນຄວາມໝາຍເດີມຂອງການບູຊາຕົ້ນສີມະຫາໂພໃນພຸດທະສາສະໜາ.

ເມື່ອວັນທີ່ 6 ພຶດສະພາ ພ.ສ 2563 ກົງກັບວັນວິສາຂະບູຊາ. ຜູ້ຂຽນ ໄດ້ຮ່ວມເດີນທາງໄປກາບສັກກາລະ ຕົ້ນສີມະຫາໂພ ທີ່ວັດນາກາງ ເມືອງທຸລະຄົມ ແຂວງວຽງຈັນ ເຊີ່ງເປັນຕົ້ນໂພທີ່ ອະດີດຍາທ່ານໃຫຍ່ ຄຳຕັນ ວໍຣະຣາຊ ໄດ້ນຳເບັຍ ຈາກພຸດທະຄະຍາ ປະເທດອິນເດຍ ມາປູກໄວ້ ເມື່ອປີ ຄ.ສ 1976. ທຸກໆປີ ເມື່ອເຖີງເດືອນ 6 ເພັງ ອະດີດ ຍາທ່ານໃຫຍ່ ຄຳຕັນ ວໍຣະຣາຊ ໄດ້ນຳສິດສານຸສິດ ມາຂາບໄຫວ້ສັກກາຣະທຸກປີ ເພື່ອເປັນການນ້ອມລະນຶກເຖີງພຣະຜູ້ມີພຣະພາກອະຣະຫັນຕະສັມມາສັມພຸດທະເຈົ້າ.

ຕາມການບອກເລົ່າ ຂອງ ພຣະ ອາຈານ ພັນທອງ ໂພມີໄຊ ຫນື່ງໃນລູກສິດຂອງອະດີດຍາທ່ານໃຫຍ່ຄຳຕັນ ວໍຣະຣາຊ ປະຈຸບັນ ເປັນເຈົ້າ ອະທິການວັດ ຈັນທະປ່າລານ (ດົງປ່າລານ) ບອກວ່າ ໃນໄລຍະຫນື່ງຕົ້ນໂພໄດ້ຕາຍໄປ ແຕ່ດ້ວຍຄວາມອັດສະຈັນຂອງຕົ້ນໂພ ມັນຈື່ງເກີດຂື້ນມາໃຫມ່ ແຕກກິ່ງກ້ານສາຂາ ອອກເປັນຫ້າຫນໍ ມີໃບດົກຫນາສວຍງາມ ໜ້າອັດສະຈັນ.

ຮັບຊົມວີດີໂອ ພຣະອາຈານ ພັນທອງ ບອກເລົ່າ

ຄວາມເປັນມາ ແລະ ຄວາມສຳຄັນຂອງຕົ້ນສີມະຫາໂພ

ທຸກໆປີ ສິດສານຸສິດ ອະດີດ ຍາທ່ານໃຫຍ່ ຄຳຕັນ ວໍຣະຣາຊ ນຳໂດຍພຣະອາຈານ ພັນທອງ ໂພມີໄຊ ຈະນຳພາໄປກາບສັກກາລະ ຕົ້ນສີມະຫາໂພແຫ່ງນີ້ ເປັນປະຈຳທຸກປີ ໃນ ວັນວິສາຂະບູຊາ ເດືອນ 6 ເພັງ ທ່ານສາມາດຮ່ວມເດີນທາງໄປນຳຄະນະສົງວັດຈັນທະປາລານໄດ້ ໃນວັນວິສາຂະບູຊາຂອງທຸກໆປີ ເລີ່ມອອກເດີນທາງ 8 ໂມງເຊົ້າຈາກນະຄອນວຽງຈັນ.