ເອວັມເມ ສຸຕັງ, ເອກັງ ສະມະຍັງ ພະຄະວາ ພາຣານະສິຍັງ ວິຫະຣະຕິ ອິສິປະຕະເນ ມິຄະທາເຍ. ຕັຕະຣະ ໂຂ ພະຄະວາ ປັນຈະວັຄຄິເຍ ພິກຂູ ອາມັນເຕສິ.
(ທາງສຸດໂຕ່ງສອງສາຍທີ່ບໍ່ຄວນປະຕິບັດ)
ທະເວເມ ພິກຂະເວ ອັນຕາ ປັພພະຊິເຕນະ ນະ ເສວິຕັພພາ ໂຍ ຈາຍັງ ກາເມສຸ ກາມະສຸຂັລລິການຸໂຍໂຄ ຫີໂນ ຄັມໂມ ໂປຖຸຊຊະນິໂກ ອະນະຣິໂຍ ອະນັຕຖະສັນຫິໂຕ ໂຍ ຈາຍັງ ອັຕຕະກິລະມະຖານຸໂຍໂຄ ທຸກໂຂ ອະນະຣິໂຍ ອະນັຕຖະສັນຫິໂຕ.
ເອເຕ ເຕ ພິກຂະເວ ອຸໂພ ອັນເຕ ອະນຸປະຄັມມະ ມັຊຊິມາ ປະຕິປະທາ ຕະຖາຄະເຕນະ ອະພິສັມພຸທທາ ຈັກຂຸກະຣະນີ ຍານະກະຣະນີ ອຸປະສະມາຍະ ອະພິນຍາຍະ ສັມໂພທາຍະ ນິພພານາຍະ ສັງວັຕຕະຕິ.
ກະຕະມາ ຈະ ສາ ພິກຂະເວ ມັຊຊິມາ ປະຕິປະທາຕະຖາຄະເຕນະ ອະພິສັມພຸທທາ ຈັກຂຸກະຣະນີ ຍານະກະຣະນີ ອຸປະສະມາຍະ ອະພິນຍາຍະ ສັມໂພທາຍະ ນິພພານາຍະ ສັງວັຕຕະຕິ.
(ທາງສາຍກາງເປັນທາງແຫ່ງຄວາມພົ້ນທຸກຄື ມັກມີອົງແປດ)
ອະຍະເມວະ ອະຣິໂຍ ອັຕຖັງຄິໂກ, ມັຄໂຄ. ເສຍຍະຖີທັງ, ສັມມາທິຕຖິ ສັມມາສັງກັປໂປ ສັມມາວາຈາ ສັມມາກັມມັນໂຕ ສັມມາອາຊີໂວ ສັມມາວາຍາໂມ ສັມມາສະຕິ ສັມມາສະມາທິ.
ອະຍັງ ໂຂ ສາ ພິກຂະເວ ມັຊຊິມາ ປະຕິປະທາ ຕະຖາຄະເຕນະ ອະພິສັມພຸທທາ ຈັກຂຸກະຣະນີ ຍານະກະຣະນີ ອຸປະສະມາຍະ ອະພິນຍາຍະ ສັມໂພທາຍະ ນິພພານາຍະ ສັງວັຕຕະຕິ.
(ອະຣິຍະສັດສີ່: ທຸກຂ໌)
ອິທັງ ໂຂ ປະນະ ພິກຂະເວ ທຸກຂັງ ອະຣິຍະສັຈຈັງ. ຊາຕິປິ ທຸກຂາ ຊະຣາປີ ທຸກຂາ ມະຣະນັມປິ ທຸກຂັງ ໂສກະປະຣິເທວະທຸກຂະໂທມະນັສສຸປາຍາສາປິ ທຸກຂາ ອັບປິເຍຫິ ສັມປະໂຍໂຄ ທຸກໂຂ ປິເຍຫິ ວິປປະໂຍໂຄ ທຸກໂຂ ຍັມປິຈສັງ ນະ ລະພະຕິ ຕັມປິ ທຸກຂັງ ສັງຂິຕເຕນະ ປັນຈຸປປາທານັກຂັນທາ ທຸກຂາ.
(ສະມຸທັຍ: ສາເຫດໃຫ້ເກີດທຸກຂ໌)
ອິທັງ ໂຂ ປະນະ ພິກຂະເວ ທຸກຂະສະມຸທະໂຍ ອະຣິຍະສັຈຈັງ. ຍາຍັງ ຕັນຫາ ໂປໂນບພະວິກາ ນັນທິຣາຄະສະຫະຄະຕາ ຕັຕະຣະ ຕັຕະຣາພິນັນທິນີ. ເສຍຍະຖີທັງ, ກາມະຕັນຫາ ພະວະຕັນຫາ ວິພະວະຕັນຫາ.
(ນິໂຣດ: ຄວາມດັບທຸກຂ໌)
ອິທັງ ໂຂ ປະນະ ພິກຂະເວ ທຸກຂະນິໂຣໂທ ອະຣິຍະສັຈຈັງ. ໂຍ ຕັສສາເຍວະຕັນຫາຍະ ອະເສສະວິຣາຄະນິໂຣໂທ ຈາໂຄ ປະຕິນິສສັຄໂຄ ມຸຕຕິ ອະນາລະໂຍ. ອິທັງ ໂຂ ປະນະ ພິກຂະເວ ທຸກຂະນິໂຣທະຄາມິນີ ປະຕິປະທາ ອະຣິຍະສັຈຈັງ.
(ມັກຄ໌: ທາງແຫ່ງຄວາມພົ້ນທຸກຂ໌)
ອະຍະເມວະ ອະຣິໂຍ ອັຕຖັງຄິໂກ ມັຄໂຄ. ເສຍຍະຖີທັງ, ສັມມາທິຕຖິ ມາສັງກັບໂປ ສັມມາວາຈາ ສັມມາກັມມັນໂຕ ສັມມາອາຊີໂວ ສັມມາວາຍາໂມ ສັມມາສະຕິ ສັມມາສະມາທິ.
(ຍານໃນອະຣິຍະສັດສີ່, ຍານຮູ້ວ່າ ນີ້ຄືທຸກຂ໌ ຄວນກຳນົດຮູ້)
ອິທັງ ທຸກຂັງ ອະຣິຍະສັຈຈັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂັງ ອະຣິຍະສັຈຈັງ ປະຣິນເຍຍຍັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂັງ ອະຣິຍະສັຈຈັງ ປະຣິນຍາຕັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
(ຍານຮູ້ວ່າ ນີ້ຄືສາເຫດແຫ່ງທຸກຂ໌ ຄວນລະຖິ້ມ)
ອິທັງ ທຸກຂະສະມຸທະໂຍ ອະຣິຍະສັຈຈັນຕິ ເມ ພິກຂະເວ ປຸພເພ ອະນະ ນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂະສະມຸທະໂຍ ອະຣິຍະສັຈຈັງ ປະຫາຕັພພັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂະສະມຸທະໂຍ ອະຣິຍະສັຈຈັງ ປະຫີນັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
(ຍານຮູ້ວ່າ ນີ້ຄືຄວາມດັບທຸກຂ໌ ຄວນຮຽນຮູ້ໃຫ້ແຈ່ມແຈ້ງ)
ອິທັງ ທຸກຂະນິໂຣໂທ ອະຣິຍະສັຈຈັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະ ປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂະນິໂຣໂທ ອະຣິຍະສັຈຈັງ ສັຈສິກາຕັພພັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂະນິໂຣໂທ ອະຣິຍະສັຈຈັງ ສັຈສິກະຕັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
(ຍານຮູ້ວ່າ ນີ້ຄືຫົນທາງດັບທຸກຂ໌ ຄວນປະພຶດປະຕິບັດເລື້ອຍໆ)
ອິທັງ ທຸກຂະນິໂຣທະຄາມິນີ ປະຕິປະທາ ອະຣິຍະສັຈຈັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາອຸທະປາທິວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂະນິໂຣທະຄາມິນີ ປະຕິປະທາ ອະຣິຍະສັຈຈັງ ພາເວຕັພພັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຕັງ ໂຂ ປະນິທັງ ທຸກຂະນິໂຣທະຄາມິນີ ປະຕິປະທາ ອະຣິຍະສັຈຈັງ ພາວິຕັນຕິ ເມ ພິກຂະເວ ປຸພເພ ອະນະນຸສສຸເຕສຸ ທັມເມສຸ ຈັກຂຸງ ອຸທະປາທິ ຍານັງ ອຸທະປາທິ ປັນຍາ ອຸທະປາທິ ວິຊຊາ ອຸທະປາທິ ອາໂລໂກ ອຸທະປາທິ.
ຍາວະກີວັນຈະ ເມ ພິກຂະເວ ອິເມສຸ ຈະຕູສຸ ອະຣິຍະສັຈເຈສຸ ເອວັນຕິປະຣິວັຕຕັງ ທະວາທະສາກາຣັງ ຍະຖາພູຕັງ ຍານະທັສສະນັງ ນະ ສຸວິສຸທທັງ ອະໂຫສິ.
ເນວະ ຕາວາຫັງ ພິກຂະເວ ສະເທວະເກ ໂລເກ ສະມາຣະເກ ສະພຣັມະເກ ສັສສະມະນະພຣາມະນິຍາ ປະຊາຍະ ສະເທວະມະນຸສສາຍະ ອະນຸຕຕະຣັງ ສັມມາສັມໂພທິງ ອະພິສັມພຸທໂທ ປັຈຈັນຍາສິງ.
ຍະໂຕ ຈະ ໂຂ ເມ ພິກຂະເວ ອິເມສຸ ຈະຕູສຸ ອະຣິຍະສັຈເຈ ເອວັນຕິປະຣິວັຕຕັງ ທະວາທະສາກາຣັງ ຍະຖາພູຕັງ ຍານະທັສສະນັງ ສຸວິສຸທທັງ ອະໂຫສິ.
ອະຖາຫັງ ພິກຂະເວ ສະເທວະເກ ໂລເກ ສະມາຣະເກ ສະພຣັມມະເກ ສັສສະມະນະ ພຣາມະນິຍາ ປະຊາຍະ ສະເທວະມະນຸສສາຍະ ອະນຸຕຕະຣັງ ສັມມາສັມໂພທິງ ອະພິສັມພຸທໂທ ປັຈຈັນຍາສິງ.
ຍານັນຈະ ປະນະ ເມ ທັສສະນັງ ອຸທະປາທິ ອະກຸປປາ ເມ ວິມຸຕຕິ ອະຍະ ມັນຕິມາ ຊາຕິ ນັຕຖິທານິ ປຸນັບພະໂວຕິ.
(ພຣະອັນຍາໂກນທັນຍະບັນລຸໂສດາບັນ)
ອິທະມະໂວຈະ ພະຄະວາ ອັຕຕະມະນາ ປັນຈະວັຄຄິຍາ ພິກຂູ ພະຄະວະໂຕ ພາສິຕັງ ອະພິນັນທຸງ. ອິມັສມິນຈະ ປະນະ ເວຍຍາກະຣະນັສມິງ ພັນຍະມາເນ ອາຍັສມະໂຕ ໂກນທັນຍັສສະ ວິຣະຊັງ ວີຕະມະລັງ ທັມມະຈັກຂຸງ ອຸທະປາທິ ຍັງກິນຈິ ສະມຸທະຍະທັມມັງ ສັພພັນຕັງ ນິໂຣທະທັມມັນຕິ.
(ສຽງແຊ່ຊ້ອງການສະແດງທັມຂອງພຣະພຸດທະເຈົ້າບັນລືລັ່ນໄປຮອດສະຫວັນຫົກຊັ້ນ ແລະ ພົມສິບຫົກຊັ້ນ)
ປະວັຕຕິເຕ ຈະ ພະຄະວະຕາ ທັມມະຈັກເກ ພຸມມາ ເທວາ ສັທທະມະນຸສສາເວສຸງ ເອຕັມພະຄະວະຕາ ພາຣານະສິຍັງ ອິສິປະຕະເນ, ມີຄະທາເຍ ອະນຸຕຕະຣັງ ທັມມະຈັກກັງ ປະວັຕຕິຕັງ ອັປປະຕິວັຕຕິຍັງ ສະມະເນນະ ວາ ພຣາມະເນນະ ວາ ເທເວ ນະ ວາ ມາເຣນະ ວາ ພຣັມຸນາ ວາ ເກນະຈິ ວາ ໂລກັສະມິນຕິ.
ພຸມມານັງ ເທວານັງ ສັທທັງ ສຸຕະວາ ຈາຕຸມມະຫາຣາຊິກາ ເທວາ ສັທທະມະນຸສສາເວສຸງ.
ຈາຕຸມມະຫາຣາຊິການັງ ເທວານັງ ສັທທັງ ສຸຕະວາ ຕາວະຕິງສາ ເທວາ ສັທທະມະນຸສສນາເວສຸງ.
ຕາວະຕິງສານັງ ເທວານັງ ສັທທັງ ສຸຕະວາ ຍາມາ ເທວາ ສັທທະມະນຸສສາເວສຸງ.
ຍາມານັງ ເທວານັງ ສັທທັງ ສຸຕະວາ ຕຸສິຕາ ເທວາ ສັທທະມະນຸສສາເວສຸງ.
ຕຸສິຕານັງ ເທວານັງ ສັທທັງ ສຸຕະວາ ນິມມານະຣະຕີ ເທວາ ສັທທະມະນຸສສາເວສຸງ.
ນິມມານະຣະຕີນັງ ເທວານັງ ສັທທັງ ສຸຕະວາ ປະຣະນິມມິຕະວະສະວັຕຕີ ເທວາ ສັທທະມະນຸສສາເວສຸງ.
ປະຣະນິມມິຕະວະສະວັຕຕີນັງ ເທວານັງ ສັທທັງ ສຸຕະວາ ພຣັມະປາຣິສັຊຊາ ເທວາ ສັທທະມະນຸສສາເວສຸງ.
ພຣັມະປາຣິສັຊຊານັງ ເທວານັງ ສັທທັງ ສຸຕະວາ ພຣັມະປະໂຣຫິຕາ ເທວາ ສັທທະມະນຸສສາສເວສຸງ.
ພຣັມະປະໂຣຫິຕານັງ ເທວານັງ ສັທທັງ ສຸຕະວາ ມະຫາພຣັມາ ເທວາ ສັທທະມະນຸສສາເວສຸງ.
ມະຫາພຣັມານັງ ເທວານັງ ສັທທັງ ສຸຕະວາ ປະຣິຕຕາພາ ເທວາ ສັທທະມະນຸສສາເວສຸງ.
ປະຣິຕຕາພານັງ ເທວານັງ ສັທທັງ ສຸຕະວາ ອັປປະມານາພາ ເທວາ ສັທທະມະນຸສສາເວສຸງ.
ອັປປະມານາພານັງ ເທວານັງ ສັທທັງ ສຸຕະວາ ອາພັສສະຣາ ເທວາ ສັທທະມະນຸສສາເວສຸງ.
ອາພັສສະຣານັງ ເທວານັງ ສັທທັງ ສຸຕະວາ ປະຣິຕຕະສຸພາ ເທວາ ສັທທະມະນຸສສາເວສຸງ.
ປະຣິຕຕະສຸພານັງ ເທວານັງ ສັທທັງ ສຸຕະວາ ອັປປະມານະສຸພາ ເທວາ ສັທທະມະນຸສສາເວສຸງ.
ອັປປະມານະສຸພານັງ ເທວານັງ ສັທທັງ ສຸຕະວາ ສຸພະກິນຫະກາ ເທວາ ສັທທະມະນຸສສາເວສຸງ.
ສຸພະກິນຫະການັງ ເທວານັງ ສັທທັງ ສຸຕະວາ ເວຫັປຜະລາ ເທວາ ສັທທະມະນຸສສາເວສຸງ.
ເວຫັປຜະລານັງ ເທວານັງ ສັທທັງ ສຸຕະວາ ອະວິຫາ ເທວາ ສັທທະມະນຸສສາເວສຸງ.
ອະວິຫານັງ ເທວານັງ ສັທທັງ ສຸຕະວາ ອະຕັປປາ ເທວາ ສັທທະມະນຸສສາເວສຸງ.
ອະຕັປປານັງ ເທວານັງ ສັທທັງ ສຸຕະວາ ສຸທັສສາ ເທວາ ສັທທະມະນຸສສາເວສຸງ.
ສຸທັສສານັງ ເທວານັງ ສັທທັງ ສຸຕະວາ ສຸທັສສີ ເທວາ ສັທທະມະນຸສສາເວສຸງ.
ສຸທັສສີນັງ ເທວານັງ ສັທທັງ ສຸຕະວາ ອະກະນິຕຖະກາ ເທວາ ສັທທະມະນຸສສາເວສຸງ.
ເອຕັມພະຄະວະຕາ ພາຣານະສິຍັງ ອິສິປະຕະເນ ມິຄະທາເຍ ອະນຸຕຕະຣັງ ທັມມະຈັກກັງ ປະວັຕຕິຕັງ ອັປປະຕິວັຕຕິຍັງ ສະມະເນນະ ວາ ພຣາມະເນນະ ວາ ເທເວນະ ວາ ມາເຣນະ ວາ ພຣັມຸນາ ວາ ເກນະຈິ ວາ ໂລກັສະມິນຕິ.
(ພຣະພຸດທະເຈົ້າກ່າວຮັບຮອງການບັນລຸທັມຂອງພຣະອັນຍາໂກນທັນຍະ)
ອິຕິຫະ ເຕນະ ຂະເນນະ ເຕນະ ມຸຫຸຕເຕນະ ຍາວະ ພຣັມະໂລກາ ສັທໂທ ອັພພຸຄຄັນສິ.
ອະຍັນຈະ ທະສະສະຫັສສີ ໂລກະທາຕຸ ສັງກັມປີ ສັມປະກັມປີ ສັມປະເວທິ. ອັບປະມາໂນ ຈະ ໂອຣາໂຣ ໂອພາໂສ ໂລເກ ປາຕຸຣະໂຫສິ ອະຕິກກັມເມວະ ເທວານັງ ເທວາ ນຸພາວັງ.
ອະຖະໂຂ ພະຄະວາ ອຸທານັງ ອຸທາເນສິ ອັນຍາສິ ວະຕະ ໂພ ໂກນດັນໂຍ ອັນຍາສິ ວະຕະໂພ ໂກນທັນໂຍຕິ.
ອິຕິຫິທັງ ອາຍັສມະໂຕ ໂກນທັນຍັສສະ ອັນຍາໂກນທັນໂຍຕະເວວະ ນາມັງ ອະໂຫສີຕິ.
(ຈົບບົດສູດທັມມະຈັກ)
