ໄຟໄຫມ້ປ່າເສຍຫາຍໃຫຍ່ຫລວງເປັນປະຫວັດການໃນລາວ ເມື່ອປະມານທ້າຍເດືອນ ມີນາ 2020 ມີລາຍງານຈາກປະຊາຊົນວ່າມີໄຟໄຫມ້ລາມປ່າເປັນວົງກວ້າງຫລາຍເຂດແຂວງພາກເຫນືອຂອງປະເທດລາວ ຄື: ເຂດແຂວງອຸດົມໄຊ ,ຫຼວງພຣະບາງ, ຜົ້ງສາລີ, ຫລວງນ້ຳທາ ( ເມືອງສີງ ) ໄຊຍະບູລີ ແລະ ບໍແກ້ວ ໄຟໄຫມ້ລາມປ່າບາງຈຸດແມ່ນຍັງສືບຕໍ່ລຸກລາມເປັນວົງກວ້າງເປັນເວລາຫລາຍອາທິດແລ້ວ
ສາເຫດໄຟໄຫມ້ປ່າ
ປະເທດລາວເປັນເມືອງຮ້ອນ ໂດຍສະເພາະໃນລະຫວ່າງເດືອນມີນາ ຫາ ພຶດສະພາ ປະເທດລາວຈະຮ້ອນອົບເອົ້າ ແນ່ນອນວ່າສາເຫດຂອງໄຟໄຫມ້ລ່າມປ່າເທື່ອນີ້ຕ້ອງມາຈາກພຶດຕິກຳຂອງມະນຸດຜູ້ໃດ່ຜູ້ຫນຶ່ງອາດຈະໂດຍຕັ້ງໃຈຫລືບໍ່ຕັ້ງໃຈ ໃນກໍລະນີ້ ຂໍຕັ້ງສະມູດຖານວ່າ ອາດຈະເກີດຈາກການຈູດປ່າເຮັດໄຮ່ ຫຼື ຄົນເຂົ້າໄປທຳມາຫາກິນໃນປ່າ ປ່ອຍຖີ້ມ ກອງຟືນ ຫລື ກອກຢາສູບ
ການດັບໄຟໄຫມ້ປ່າ
ເນື່ອງຈາກເຂດພາກເຫນືອຂອງປະເທດລາວຫຼາຍບ່ອນເປັນພູດອຍສູງຊັນ ເຂົ້າເຖີງໄດ້ຍາກ ຈຶ່ງເຮັດໃຫ້ການຍຸດຕິໄຟປ່າລຸກລາມນີ້ຍາກລຳບາກພໍສົມຄວນ ອາໄສແຕ່ປະຊາຊົນໃນບ້ານຍັງບໍ່ສາມາດດັບໄຟລາມປ່ານີ້ໄດ້ງ່າຍ ປະຊາຊົນຈະສາມາດັບໄຟປ່າລຸກລາມນີ້ຕາມບໍລິເວນໄກ້ບ້ານເຮືອນ,ຮົ້ວສ່ວນເທົ່ານັ້ນ ດັ່ງນັ້ນຄວາມສາມັກຄີ ອົດທົນ ແລະ ການຮ່ວມມືຈາກຫຼາຍພາກສ່ວນຈຶ່ງຈຳເປັນໃນເວລານີ້
ເມື່ອ ວັນທີ 07 ເມສາ 2020 ກຳລັງ ປກຊ ເມືອງເມິງ ແລະ ຊາວບ້ານຕໍແລ ແຂວງບໍ່ແກ້ວ ຈຳນວນໜຶ່ງ ໄດ້ມາຊ່ວຍກັນມອດໄຟໄມ້ລາມປ່າ ເປັນບໍລິເວນກ້ວາງ, ປະຈຸບັນ ຍັງບໍ່ທັນສາມາດ ດັບໄຟດັ່ງກ່າວ ໄດ້ເທື່ອ. ຮຽກຮ້ອງ ໃຫ້ພາກສ່ວນກ່ຽວຂ້ອງ ເຂົ້າຊ່ວຍເຫຼືອ ດ່ວນ.
ເມື່ອວັນທີ່ 03 ເມສາ ທີ່ເມືອງນ້ຳບາກ ແຂວງຫຼວງພຣະບາງ ນຳໂດຍ ເຈົ້າເມືອງ ເມືອງນ້ຳບາກ ພ້ອມດ້ວຍ ທະຫານຈຳນວນຫນຶ່ງ ແລະ ອາສາສະມັກ ອ້າຍນ້ອງປະຊາຊົນ ບ້ານນາຍາງເຫນືອ,ບ້ານນາຍາງໃຕ້ ແລະ ບ້ານຫ້ວຍຫ້າ ຊ່ວຍກັນດັບໄຟໄມ້ລາມປ່າ
ຄວາມເສຍຫາຍ
ນອກຈາກຈະສ້າງຄວາມເສຍຫາຍຢ່າງໃຫຍ່ຫລວງຕໍ່ລະບົບນິເວດ,ພືນປ່າ ແລະ ສັດປ່າ ນານາຊະນິດແລ້ວ ໄຟໄມ້ປ່ານີ້ຍັງເປັນເຫດເຮັດໃຫ້ສະພາບອາກາດບໍ່ສະອາດ ເຕັ້ມໄປດ້ວຍ ມົນລະຜິດ ມອກຄວັນ ເຮັດໃຫ້ການດຳເນີນຊີວິດຂອງປະຊາຊົນຍາກລຳບາກ ເພາະຂາດອາອາດບໍລິສຸດຫາຍໃຈ ຫຼື ອາດຈະເຖີງຂັ້ນເຮັດວຽກບໍ່ໄດ້ໃນບໍລິເວນໄກ້ຄຽງ.
ອີງຕາມການລາຍງານຂອງຫ້ອງການກະສິກໍາ ແລະ ປ່າໄມ້ປະຈໍາເມືອງໄຊ ໃຫ້ຮູ້ວ່າ: ມາຮອດວັນທີ 4 ເມສາ 2020 ມີເນື້ອທີ່ປ່າໄມ້ ຂອບເຂດເມືອງໄຊຮັບຜິດຊອບ ຖືກໄຟໄຫມ້ທັງຫມົດຫລາຍກວ່າ 18,000 ເຮັກຕາ, ໃນນີ້ມີປ່າສະຫງວນແຫ່ງຊາດ ພູຫີ່ຜີ 7,000 ກວ່າເຮັກຕາ, ກວມເອົາ 18 ບ້ານ, ປ່າຜະລິດແຫ່ງຊາດສາຍນໍ້າງາ 6,000 ກວ່າເຮັກຕາ ກວມ 7 ບ້ານ, ປ່າຜະລິດແຫ່ງຊາດ ສາຍ ນ້ໍາພາກ 1,000 ກວ່າເຮັກຕາ ກວມເອົາ 2 ບ້ານ ແລະ ປ່າສະຫງວນຂອງແຂວງ, ເມືອງ ແລະ ບ້ານ ອີກ 4,000 ກວ່າເຮັກຕາ.
#ໄຟໄຫມ້ປ່າ #ໄຟໄມ້ປ່າ #ປ່າໄມ້ລາວ #ປ່າໄມ້ລາວເສຍຫາຍ #ຫຼວງພຣະບາງ #ອຸດົມໄຊ #ເມືອງງອຍ #ຜາແດງ #ຫຼວງນ້ຳທາ
