ມະຫາວິທະຍາໄລ ມະຫາຈຸລາລົງກອນຣາຊະວິທະຍາໄລ(ມຈຣ) ເປັນ ມະຫາວິທະຍາໄລແຫ່ງຄະນະສົງໄທ ສ້າງຕັ້ງຂຶ້ນໂດຍພຣະມະຫາກະສັດ ຣາຊະການທີ 5 ປັນຈຸບັນຢູ່ພາຍໃຕ້ລັດ ແລະໄດ້ຮັບເງິນສະໜັບສະໜູນຈາກລັດຖະບານໄທທຸກປີ. ມຈຣ ສ່ວນກາງຕັ້ງຢູ່ ເມືອງວັງນ້ອຍ ແຂວງພຣະນະຄອນສີອະຍຸດທະຍາ ກຸງເທບ. ເປັນສະຖານບັນການສຶກສາພຣະໄຕຣປິດົກ ແລະ ວິຊາການຊັ້ນສູງສຳຫຼັບພຣະພິກຂຸ ສະມາເນນ ແລະ ຄະລາວາດທົ່ວໄປ.

ມຈຣ. ມີສາຂາ ຫຼື ວິທະຍາເຂດ 10 ກວ່າວິທະຍາເຂດທົ່ວປະເທດ ແລະມະຫາຈຸລາລົງກອນຣາຊະວິທະຍາໄລ.ວິທະຍາເຂດຂອນແກ່ນ ເປັນວິທະຍາເຂດທີ່ໃຫຍ່ທີ່ສຸດໃນພາກອິສານ ແຕ່ລະປີ ມີນິສິດນັກສຶກສາຫຼາຍພັນຄົນ ຫຼາຍເຊື້ອຊາດທັງພຣະສົງ ແລະ ຄະລາວາດເຂົ້າມາສຶກສາ ສະເພາະຄົນລາວປີໜຶ່ງເຄີຍມີເປັນຮ້ອຍ ແລະ ຍັງມີຄະລຶຫັດລາວໄປຮຽນນຳອີກ.

ເມື່ອວັນທີ 7 ມີນາ 2025 ພຣະຣາຊພັດທະນະວະຊະຣະບັນດິດ ຮສ.ດຣ,ຮອງອະທິການບໍດີ ມຈຣ.ຂອນແກ່ນ ໄດ້ມີຄຳສັ່ງແຕ່ງຕັ້ງພຣະພັນທອງ ວິສຸດທິປັນໂຍ,ໂພມີໄຊ ເຈົ້າອາວາດວັດຈັນທະປ່າລານເປັນຫົວຫນ້າຜູ້ປະສານງານພຣະນິສິດຕ່າງປະເທດ ປະຈຳປະເທດລາວ.ພຣະພັນທອງ ເປັນສິດເກົ່າ ມຈຣ.ຂອນແກ່ນຍຸກທຳອິດ ແຕ່ປີ ຄ.ສ 2012 ໄດ້ຮັບການຍົກຍ້ອງຈາກຫຼວງປູ່ພຣະເທບກິດຕິລັງສີ ອະດີດເຈົ້າຄະນະຈັງຫວັດຂອນແກ່ນ ເຈົ້າອາວາດວັດທາດພຣະອາລາມຫຼວງຫຼາຍໃນເລື່ອງຂອງວັດປະຕິບັດ ເມື່ອຫຼວງປູ່ຄຳຕັນ ວໍຣະຣາຊ ອະດີດເຈົ້າອະທິການວັດຈັນທະປ່າລານ ມໍລະນະພາບຈຶ່ງໄດ້ເປັນເຈົ້າອາວາດແທນ ແລ້ວຈຶ່ງກັບມາຮຽນຕໍ່ ປະລິນຍາໂທສາຂາພຸດທະສາດສະໜາ ທີ່ ມຈຣ ວິທະຍາເຂດຫນອງຄາຍ ພສ 2566 ໄດ້ຮັບລາງວັນສິດເກົ່າດີເດັ່ນຈາກ ມຈຣ.ຂອນແກ່ນ ພຣະອາຈານພັນທອງ ຍັງໄດ້ຊ່ວຍປະສານງານກັບມຈຣ ຂອນແກ່ນມາຕະຫລອດ ແລະ ຊ່ວຍເຫລືອກິດຈະກຳຂອງຊົມຣົມນິສິດລາວມາບໍ່ໄດ້ຂາດ.

ໂດຍການຮ່ວມເປັນສັກຂີພິຍານຈາກທາງຄະນະສົງ ນຳໂດຍ ພຣະຫຼັກແກ້ວ ມະຫາສຸເມທາທິບໍດີ (ບຸນມາ ສິມມາພົມ)ຮັກສາການປະທານສູນກາງ ອ.ພ.ສ , ພຣະອາຈານ ພຸດທະສອນ ອ່ອນອົງສາ ປະທານທີ່ປຶກສາຝ່າຍສົງ ມູນນິທີຊ່ອຍເຫລືອຄົນທຸກຍາກ ແຫ່ງ ສປປ ລາວ ແລະ ຝ່າຍຄາຣາວາດ ໂດຍ ທ່ານສິລະວົງ ຄຸດໄພທູນ ປະທານສູນກາງແນວລາວສ້າງຊາດ ,ແມ່ປ້ານາລີ ສີສຸລິດ ພັນລະຍາປະທານປະເທດ ແຫ່ງ ສປປ ລາວ.

ວັດຜາໂອ ຫຼື ໂຮງຮຽນມັດທະຍົມສົງຕອນຕົ້ນ ບ້ານຜາໂອ ເຂດປາກເຊືອງ ເມືອງຫຼວງພະບາງ ຕາມການລາຍງານທາງເຟສບຸກ ຂອງ ສາທຸໃຫຍ່ ອ່ອນແກ້ວ ກິດຕິພັດໂທ, ເຈົ້າອະທິການ ວັດຜາໂອ ໃຫ້ຮູ້ວ່າມີສະມະເນນ 560 ຄົນ. ແຕ່ເມື່ອມີສະພາບໂຄວິດລະບາດ ໂຮງຮຽນໄດ້ປິດລົງ, ງົດການໄປບິນດະບາດ. ສະມະເນນຈໍານວນໜຶ່ງ ກໍເລີຍຂໍຍ້າຍກັບໄປຢູ່ວັດບ້ານຂອງຕົນ, ຈໍານວນໜຶ່ງກໍລາສິກຂາ ປັດຈຸບັນມີພຣະສົງ-ສະມະເນນ 469 ເປັນສະມະເນນ 447 ຕົນ ພຣະ 22 ອົງ.

ເມື່ອວັນທີ່ 11 ຕຸລາ ທາງຄະນະສະເພາະກິດຂັ້ນນະຄອນຫຼວງພຣະບາງ ໄດ້ອອກແຈ້ງການໃຫ້ວັດປ່າຜາໂອ ເປັນເຂດສີແດງປິດການເຂົ້າ-ອອກ (Lock down) ເມື່ອມີສະມະເນນຕິດເຊື້ອໂຄວິດ. ປັດຈຸບັນ ວັນທີ່ 17 ຕຸລາ ນີ້ ມີສະມະເນນຕິດເຊື້ອໂຄວິດ 18 ຕົນ , ໃນນັ້ນ ມີ ພຣະສົງ 1 ອົງ.  ຍັງນອນຄ້າງຢູ່ທີ່ກັກໂຕ ໂຮງໝໍແຂວງ 3 ຄົນ (ມີພຣະ 1 ອົງ, ຈົວ 2 ຕົນ). ກັກໂຕ ປິ່ນປົວຢູ່ສູນກັກໂຕ ທີ່ວັດຜາໂອ 15 ຕົນ,  ກຸ່ມສ່ຽງດຽວນີ້ຍັງ 46 ຕົນ.

ດັ່ງນັ້ນ, ມູນນິທີຊ່ວຍເຫລືອຄົນທຸກຍາກແຫ່ງ ສປປ.ລາວ ຈຶ່ງໄດ້ຊ່ວຍລະດົມທຶນຜ່ານຊ່ອງທາງສື່ອອອນລາຍ ແລະ ສື່ສານມວນຊົນ ໃຫ້ພຸດທະສາສະນິກກະຊົນຜູ້ໃຈບຸນທັງຫຼາຍຊ່ວຍບໍລິຈາກ ໂດຍການໂອນເງິນຜ່ານບັນຊີຂອງວັດປ່າຜາໂອ ນະຄອນຫລວງພຣະບາງ ໂດຍກົງ.

ສາທຸຊົນຜູ້ໃຈບຸນ ສາມາດຮ່ວມບໍລິຈາກໄດ້ຜ່ານ QR ໂຄດຂ້າງລຸ່ມນີ້ ຫຼື ຕິດຕໍ່ສອບຖາມ 020 56 068 899 ແລະ 020 55 044 419.

ພຣະອາຈານແກ້ວ ສັນຕິໂກ (ສຸວັນນະກຸມມານ)​ ເຈົ້າອະທິການວັດໂພນສີສະຫວ່າງ ຮອງເຈົ້າຄະນະເຂດກ່າວວ່າ ໂຄງການກໍ່ສ້າງເລີ່ມດຳເນິນການມາຕັ້ງແຕ່ ອອກໃຫມ່ 3 ຄໍ່າເດືອນ 12 ພສ 2560 ຄສ 2017 ສຳເລັດແລ້ວປະມານ 90% ຊຶ່ງຄາດວ່າຈະສຳເລັດໃນເດືອນ ເມສາ ຄສ 2022 ຄາດວ່າມູນຄ່າລວມການກໍ່ສ້າງທັງຫມົດຈົນສຳ​ເລັດ 9,000,000,000 (9 ຕື້ກີບ). ສາທຸຊົນຜູ້ມີຈິດສັດທາ ຢາກຮ່ວມບໍລິຈາກປັດໄຈຮ່ວມສ້າງພຣະພຸດທະຮູບໃຫຍ່ ສາມາດຕິດຕໍ່ກັບທາງວັດໂພນສີສະຫວ່າາງ ບ້ານທ່າຊ້າງໄດ້ໂດຍກົງ.

ນອກຈາກນັ້ນ ວ່າງມາດົນມານີ້ ຍັງໄດ້ມີກ້ອງປະຊຸມກະກຽມໂຄງການກໍ່ສ້າງພຣະພຸດທະຮູບໃຫຍ່ ຢູ່ເຂດເສດຖະກິດພິເສດ ບຶງທາດຫຼວງ ໂດຍການເປັນປະທານຂອງທ່ານ ສາສະດາຈານ ປອ.ກິແກ້ວ ໄຂຄຳພິທູນ,ຮອງນາຍົກລັດຖະມົນຕີ,ປະທານຄະນະຊີ້ນຳລະດັບຊາດ ແລະ ພຣະຫຼັກແກ້ວ ມະຫາເຫວດ ມະເສໄນ ຮອງປະທານສູນກາງອົງການພຸດທະສາສະໜາສຳພັນລາວ,ບັນດາທ່ານຮອງລັດຖະມົນຕີ,ທ່ານຮອງເຈົ້າຄອງນະຄອນຫຼວງວຽງຈັນ,ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດຖະກິດພິເສດ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂດຍຈຸດປະສົງຂອງກອງປະຊຸມຄັ້ງທຳອິດຂອງຄະນະຊີ້ນຳລະດັບຊາດ ກ່ຽວກັບໂຄງການກໍ່ສ້າງພຣະພຸດທະຮູບໃຫຍ່ໃນຄັ້ງນີ້ ແມ່ນ ເພື່ອ ຄົ້ນຄວ້າ ປຶກສາ ກະກຽມວຽກງານໂຄງການກໍ່ສ້າງ ແລະ ສະເໜີຄະນະຮັບຜິດຊອບການໂຄງການກໍ່ສ້າງ ເຊີ່ງປະກອບມີ ຄະນະຊີ້ນຳລວມ,ຄະນະຕິດຕາມກວດກາພາກສະໜາມ ແລະ ກອງເລຂາຊ່ວຍວຽກງານໂຄງການ ພ້ອມທັງ ແບ່ງໜ້າທີ່ຄວາມຮັບຜິດຊອບຂອງຄະນະ ຕໍ່ ໂຄງການກໍ່ສ້າງພຣະພຸດທະຮູບໃຫຍ່ນີ້ ຕາມຂໍ້ຕົກລົງ ສະບັບເລກທີ 47/ນຍ,ລົງວັນທີ່ 28 ພຶດສະພາ 2021.

ໃນໂອກາດນີ້ ທ່ານ ສຈ.ປອ. ກິແກ້ວ ໄຂຄຳພິທູນ ໄດ້ມີຄຳເຫັນວ່າ ເຂດເສດຖະກິດພິເສດນີ້ ໄດ້ມີການພັດທະນາຢ່າງຕໍ່ເນື່ອງ ແລະ ໄດ້ປະກອບສ່ວນເຂົ້າໃນການພັດທະນາເສດຖະກິດ ສັງຄົມ ເປັນຕົ້ນແມ່ນ ຊ່ວຍຍົກລະດັບສີມືແຮງງານ,ສ້າງວຽກເຮັດງານທຳ ພ້ອມທັງເປັນອີກຖານລາຍຮັບໜື່ງໃຫ້ກັບລັດຖະບານ ແລະ ເຫັນວ່າ ການພັດທະນາຢູ່ເຂດເສດຖະກິດພິເສດ ມີຫຼາຍຮູບແບບ ມີທັງເຂດອຸດສະຫະກຳຜະລິດ ການຂົນສົ່ງ ການພັດທະນາເມືອງໃຫມ່ທີ່ທັນສະໄໝເປັນມິດກັບສິ່ງແວດລ້ອມ ແລະ ວັດທະນະທຳ.

ໂດຍສະເພາະ ໂຄງການກໍ່ສ້າງພຣະພຸດທະຮູບໃຫຍ່ນີ້ ເປັນໂຄງການທີ່ແນ່ໃສ່ການອະນຸລັກ ແລະ ສົ່ງເສີມວັດທະນະທຳ,ປະຫວັດສາດ ແລະ ຮີດຄອງປະເພນີອັນດີງາມຂອງຊາດລາວ.ເສີມສ້າງພຸດທະສາສະໜາໃຫ້ມີຄວາມຢືນຢົງທັນກັບຍຸກສະໄໝ ແລະ ຈະເປັນການຊຸກຍູ້ໃຫ້ເຂດເສດຖະກິດພິເສດແຫ່ງນີ້ ກາຍເປັນສູນລວມທາງດ້ານເສດຖະກິດ ວັດທະນະທຳ ປະຫວັດສາດ ອັນດີງາມຂອງຊາດຕໍ່ໄປ. ແນວໃດກໍ່ຕາມ ໂຄງການກໍ່ສ້າງພຣະພຸດທະຮູບຂະນາດໃຫຍ່ໃນເຂດເສດຖະກິດພິເສດ ບຶງທາດຫຼວງນີ້ ແມ່ນຢູ່ໃນແຜນການ ທີ່ບໍລິສັດ ຫວັ່ນເຟິງ ຊ່ຽງໄຫ້ (Wan Feng Shanghai) ເຈົ້າຂອງສຳປະທານ ໄດ້ສະເໜີໄວ້ຕັ້ງແຕ່ເດືອນ ສິງຫາ ປີ 2020 ໂດຍບໍລິສັດໄດ້ໃຫ້ເຫດຜົນວ່າ ພຣະພຸດທະຮູບເປັນທີ່ເຄົາລົບນັບຖື ຂອງ ພຸດທະສາສະນິກກະຊົນໃນລາວ ໄທ ແລະ ມຽນມາ ກຳປູເຈຍ ຫວຽດນາມ ແລະ ທົ່ວໂລກ ຖ້າໄດ້ສ້າງພຣະພຸດທະຮູບຂື້ນພາຍໃນເຂດ ບຶງທາດຫຼວງ ຈະດຶງດູດໃຫ້ຄົນຈຳນວນຫຼາຍຈາກທຸກທິດ ເດີນທາງເຂົ້າມາຂາບໄຫວ້ ຖືວ່າເປັນການສົ່ງເສີມການທ່ອງທ່ຽວ ແລະ ສ້າງລາຍຮັບເຂົ້າປະເທດລາວຫຼາຍຂື້ນອີກດ້ວຍ.

ກ່ອນໜ້ານີ້ ທາງບໍລິສັດ ບາງກອກ ເຊນ ຮອທສປິໂທ ລາຍງານວ່າ  ໂຮງໝໍກະເສມຣາດ ອິນເຕີຣ໌ເນຊັ່ນແນວ ວຽງຈັນ  ມີແຜນຈະເປີດໃຫ້ບໍລິການໃນໄລຍະທ້າຍ ປີ 2020 ແຕ່ໂຄງການກໍ່ສ້າງເກີດຄວາມຫຼ້າຊ້າ ແລະ ການລະບາດຂອງໂຄວິດ-19. ໂຮງໝໍກະເສມຣາດ ມີ 254 ຕຽງ ແລະ 38 ຫ້ອງກວດ ໃຫ້ບໍລິການທາງການແພດທີ່ກວ້າງຂວາງ ແລະ ອຸປະກອນທາງການແພດທີ່ລ້ຳສະໄໝ ພ້ອມດ້ວຍທ່ານໝໍຫຼາຍປະສົບການຈະມາຮັກສາປະຊາຊົນທຸກຊັ້ນຄົນໃນ ສປປ.ລາວ.

ທ່ານ ສາດສະດາຈານ ດຣ. ສະເຫຼີມ ຫານພານິດ ໄດ້ກ່າວວ່າ ໂຮງໝໍກະເສມຣາດ ອິນເຕີຣ໌ແນຊັ່ນແນລ ວຽງຈັນ ເປັນໂຮງໝໍເອກກະຊົນແຫ່ງທຳອິດທີ່ໃຫຍ່ທີ່ສຸດໃນ ສປປ.ລາວ ເກີດຂຶ້ນຈາກການຮ່ວມທຶນລະຫວ່າງ ບໍລິສັດບາງກອກເຊນ ຮອັທສປີໂທ ພລັບລິກ ຈຳກັດ ແລະ ບໍລິສັດ ວິເອັສພີ. ໂຮງໝໍພວກເຮົາແມ່ນຕັ້ງຢູ່ຈຸດໃຈກາງຂອງນະຄອນຫຼວງວຽງຈັນ ເພື່ອໃຫ້ບໍລິການທາງດ້ານສຸຂະພາບທີ່ດີໄດ້ມາດຕະຖານ JCI ສຳຫຼັບຊາວຕ່າງຊາດທີ່ເຂົ້າມາລົງທຶນ ແລະ ປະຊາຊົນລາວ. ເມື່ອທ່ານເຂົ້າມາໃຊ້ບໍລິການ ທ່ານຈະບໍ່ມີຄວາມຮູ້ສຶກວ່າ ຢູ່ ໂຮງໝໍ ແຕ່ທ່ານຈະໄດ້ຮັບຄວາມຮູ້ສຶກວ່າ ທ່ານຢູ່ໃນໂຮງແຮມຫ້າດາວ.

ທ່ານ ປອ ນາງ ວາລີ ເວດສະພົງ ໄດ້ກ່າວວ່າ ໂຮງໝໍກະເສມຣາດຂອງພວກເຮົາແມ່ນໄດ້ເລີ່ມວາງສີລາເລີກ ແລະ ວາງເສົາເຂັມກໍ່ສ້າງມາຕັ້ງແຕ່ວັນທີ 25 ພຶດສະພາ 2018 ມາຈົນຮອດປະຈຸບັນນີ້ເປັນເວລາ 3 ປີ, ດ້ວຍສີມືການກໍ່ສ້າງຈາກວິສະວະກອນໄທ ແລະ ລາວ , ການອອກແບບຕົກແຕ່ງພາຍໃນຂອງໂຮງໝໍເພື່ອຕອບຮັບຄອນເຊັບກໍ່ສ້າງໃນການເປັນສູນສຸຂະພາບລະດັບມາດຕະຖານສາກົນໂດຍມີການນໍາໃຊ້ອຸປະກອນລວມເຖິງເຄື່ອງໄມ້ເຄື່ອງມືຕ່າງໆທີ່ໄດ້ມາດຕະຖານ ແລະ ເປັນຍອມຮັບລະດັບສາກົນ.

ທ່ານ ດຣ.ບຸນແຝງ ພູມມະໄລສິດ ຕ່າງໜ້າລັດຖະບານໄດ້ກ່າວວ່າ ລັດຖະບານ ມີຄວາມຍິນດີ ໄດ້ອະນຸຍາດໃຫ້ສ້າງຕັ້ງໂຮງໝໍ ເພື່ອໃຫ້ເປັນໂຮງຫມໍເອກະຊົນທີ່ໄດ້ມາດຕະຖານ ເພື່ອເປັນການຫຼຸດຜ່ອນປະຊາຊົນລາວໄປໃຊ້ບໍລິການປິ່ນປົວຢູ່ຕ່າງປະເທດ.

Sources:

ກັມມາທິການເຜີຍແຜ່ສີລະທັມ

Bangkok Chain Hospital

Facebook Live: Grand Opening Kasemrad International Hospital,Vientiane ເມື່ອວັນທີ່ 19 ສິງຫາ 2021

ລົດໄຟຈີນ-ລາວ ສ້າງໄກ້ສຳເລັດແລ້ວ 100% ກຳລັງກຽມເປີດໃຫ້ບໍລິການຄັ້ງທຳອິດ ໃນວັນທີ່ 2 ທັນວາ 2021 ນີ້ ກົງກັບວັນຊາດລາວ. ຖືວ່າເປັນທາງລົດໄຟຕ່າງປະເທດເສັ້ນທຳອິດທີ່ເຊື່ອມກັບລະບົບລົດໄຟຂອງຈີນ.

ເສັ້ນທາງລົດໄຟຍາວ 422 ກມ ຈາກນະຄອນຫຼວງວຽງຈັນ ໄປ ເຖີງ ສິບສອງປັນນາ ໃຊ້ເວລາ ພຽງ 4 ຊົ່ວໂມງ ກ່ອນຈະເດີນທາງຕໍ່ໄປ ເມືອງຄຸນມິ່ງ ມົນທົນຍູນນານ ດ້ວຍລາຄາປີ້ປະມານ 145.000kip/88¥.

ເສັ້ນທາງລົດໄຟຜ່ານຫຼາຍເມືອງ ເລີ່ມຈາກ ນະຄອນຫຼວງວຽງຈັນ-ວັງວຽງ-ຫຼວງພຣະບາງ-ສິບສອງປັນນາ-ຄຸນມິ່ງ-ຕ້າລີ່-ລີ່ຈຽງ-ແຊງກຣີຫຼ້າ-ຕິເບດ (ຈາກຄຸນມິ່ງເຖີງຕິເບດຄາດວ່າຈະເປີດໃຫ້ບໍລິການປີໜ້າ).

ເສັ້ນທາງລົດໄຟລາວຈີນ-ລາວ ດ້ວຍໄລຍະທາງລວມ 422 ກມ ປະກອບໄປດ້ວຍອຸໂມງ 75 ແຫ່ງ, ຂົວ ຄວາມຍາວລວມ 62 ກມ ແລະ ລົດໄຟຈະແລ່ນດ້ວຍຄວາມໄວ 160 ກມ/ຊມ.

ສະຖານີທີ່ໃຫຍ່ທີ່ສຸດຂອງເສັ້ນທາງລົດໄຟຄື ສະຖານີນະຄອນຫຼວງວຽງຈັນ ຄວບຄຸ້ມພື້ນທີ່ 14,543 ຕາລາງກິໂລແມດ ສາມາດຮອງຮັບຜູ້ໂດຍສານໄດ້ເຖີງ 2,500 ຄົນ ກໍ່ສ້າງໂດຍ ບໍລິສັດໄຊນ່າ ເຣລເວຍ໌ ຄອນສະຕຣັກຊັ່ນ ກຣຸ໋ບ (CRCG).

ການກໍ່ສ້າງເລີ່ມຕັ້ງແຕ່ເດືອນ ທັນວາ 2016 ເຊີ່ງຈີນເປັນຜູ້ສະນັບສະນູນມູນຄ່າການລົງທຶນ 70% ລວມທັງເທັກໂນໂລຍີ ແລະ ອຸປະກອນຕ່າງໆ.

ເສັ້ນທາງລົດໄຟໄດ້ຕັດຜ່ານພູຜາປ່າໄມ້ ແຜ່ນການກໍ່ສ້າງຖືກປັບປ່ຽນຫຼາຍເທື່ອ ເພື່ອຫຼຸດຜົນກະທົບຕໍ່ທຳມະຊາດ ສິ່ງແວດລ້ອມ ແລະ ວິທີຊີວິດສັດປ່າ.

ເສັ້ນທາງລົດໄຟ ເປັນສ່ວນໜື່ງຂອງໂຄງການເສັ້ນທາງສາຍໄໝໃໝ່ຂອງຈີນ ມີຈຸດໝາຍສ້າງເຄື່ອຄ່າຍການຄ້າ ການລົງທຶນ ແລະ ໂຄງສ້າງພື້ນຖານ.

ຫຼັງຈາກເປີດເສັ້ນເສັ້ນທາງລົດໄຟຈີນ-ລາວ ແລ້ວ ຄາດວ່າຈະມີນັກທ່ອງທ່ຽວ ຫຼັງໄຫຼ່ເຂົ້າມາປະເທດລາວເປັນຈຳນວນຫຼາຍ ແລະ ເສັ້ນທາງໃນຝັນຂອງນັກທ່ອງທ່ຽວ ນະຄອນຫຼວງວຽງຈັນ-ວັງວຽງ-ຫຼວງພະບາງ-ສິບສອງປັນນາ-ຄຸນໝິງ – ຕ້າຫຼີ-ລີຈ່ຽງ-ແຊງເກີລີລ່າ- ທິເບດໃກ້ຈະເຂົ້າສູ່ຄວາມເປັນຈິງແລ້ວ.

ທີ່ມາຂ່າວ:

สิบสองปันนา หลวงพระบาง

China Report ASEAN – Thailand

รถไฟจีน-ลาว ใกล้เสร็จ : Suthichai live 08/06/2564

China Xinhua News

ຫົວຫນ້າຫນ່ວຍງານສັງຄົມສົງເຄາະ,ປະທານມູນນິທິຊ່ວຍເຫລືອຄົນທຸກຍາກສາຂານະຄອນຫລວງວຽງຈັນ,ຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ແລະ ຄະນະທີ່ປຶກສາວຽກງານສາສນາຂອງສູນກາງແນວລາວສ້າງຊາດ ແລະ ທ່ານ ນາງພອນວິໄລ ແສນປະເສີດ ຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ແລະ ຄະນະທີ່ປຶກສາວຽກງານສາສນາ ຂອງສູນກາງແນວລາວສ້າງຊາດ ແລະ ພຣະສົງຈາດວັດ ມະຫາພຸດທະວົງສາປ່າຫລວງພ້ອມດ້ວຍທ່ານ ໄຊບັນດິດ ຣາຊະພົນ ປະທານສະມາຄົມຕັດຫຍິບ ສະມາຊິກສະພາແຫ່ງຊາດເຂດເລືອກຕັ້ງແຂວງຈຳປາສັກພ້ອມດ້ວຍທ່ານ ພິມມະສອນ ອາມິນທະລາດ,ທ່ານ ບຸນພະມິດ ໂສມວິຈິດ ແລະ ຕ່າງຫນ້າ ທ່ານ ຕັນ ພິມພິສານ ໄດ້ນຳເອົາປັດໃຈຈຳນວນ 145.000.000ກີບ ແລະ ເຄື່ອງປ້ອງກັນໄວລັດມູນຄ່າ 11.000.000ກີບລວມທັງຫມົດເປັນມູນຄ່າ 156.000.000ກີບມາມອບໃຫ້ທ່ານປະທານ ສູນກາງແນວລາວສ້າງຊາດ ໂດຍມີທ່ານ ເຢເກີຢ່າ ນໍຈໍຈົງຕົວ ຮອງປະທານ ແລະ ຄະນະກົມຫົວຫນ້າຫ້ອງການເຂົ້າຮ່ວມເປັນສັກຂີພະຍານພິທີຮັບຄັ້ງນີ້.

ໃນສະພາວະການປັດຈຸບັນ ສັງຄົມໂລກ ໄດ້ປະສົບກັບພະຍາດຮ້າຍແຮງ ຄືການແຜ່ລະບາດຂອງພະຍາດຈຸລະໂລກອັກເສບປອດສາຍພັນໃໝ່ (COVID 19) ເຊິ່ງເປັນໂລກພະຍາດທີ່ນັບວ່າຮ້າຍແຮງ ເກີດຂຶ້ນໃນສັງຄົມມະນຸດ ຖືເປັນມະຫັນຕະໄພໃຫຍ່ຄຸກຄາມ, ສົ່ງຜົນກະທົບ ແລະ ສ້າງຄວາມເສຍຫາຍຢ່າງໃຫຍ່ຫຼວງຕໍ່ເສດຖະກິດ, ສັງຄົມ, ວິຖີຊີວິດ, ສຸຂະພາບ ແລະ ຊັບສິນ ຂອງປະເທດຕ່າງໆ ແລະ ປະຊາຊົນໃນທົ່ວໂລກ ໂດຍລວມ, ໂດຍສະເພາະ ຢູ່ໃນ ສປປ ລາວ ກໍໄດ້ຮັບໄພອັນຕະຣາຍ ຈາກການແຜ່ລະບາດຂອງພະຍາດດັ່ງກ່າວນີ້ ເໝື່ອນກັນ ເຊິ່ງໃນປັດຈຸບັນ ໃນໄລຍະ 1 ອາທິດທີ່ຜ່ານ ມາການແຜ່ລະບາດ ຂອງພະຍາດໂຄວິດ (COVID 19) ໃນ ສປປ ລາວ ກໍຍັງສືບຕໍ່ສ້າງໄພອັນຕະຣາຍ, ຄວາມຫ່ວງກັງວົນ, ສະພາບຈິດຕົກ ແລະ ຢ້ານກົ່ວ ຕໍ່ພຸດທະສາສະນິກະຊົນ ກໍຄື ປະຊາຊົນລາວບັນດາເຜົ່າຢູ່.

ໃນໄລຍະທີ່ຜ່ານມາຈົນເຖິງປັດຈຸບັນ ທາງອົງການຈັດຕັ້ງພັກ-ລັດ ທຸກຂັ້ນທຸກພາກສ່ວນ ກໍໄດ້ ເອົາໃຈໃສ່ຢ່າງແຂງຂັນ, ອຸດສາຫະພາກພຽນພະຍາຍາມ ຮັບຜິດຊອບສູງ ໃນການສະກັດກັ້ນ, ຄວບຄຸມ, ປ້ອງກັນ, ຮັກສາ, ປິ່ນປົວ ແລະ ແກ້ໄຂ ການລະບາດ ຂອງພະຍາດ (COVID 19) ດັ່ງກ່າວ ພ້ອມກັບທັງ ໄດ້ຄວາມຮ່ວມແຮງຮ່ວມໃຈ ຂອງພຣະສົງ-ສາມະເນນ, ພຸດທະສາສະນິກະຊົນ ແລະ ພີ່ນ້ອງປະຊາຊົນລາວບັນດາເຜົ່າ ໄດ້ຕັ້ງໜ້າສະກັດກັ້ນ, ຄວບຄຸມ, ປ້ອງກັນ ແລະ ແກ້ໄຂ ຈົນເປັນຜົນສຳເລັດຢ່າງດີ, ສາມາດຄວບຄຸບພະຍາດໄດ້ໃນເບື້ອງຕົ້ນ ບໍ່ໃຫ້ແຜ່ລະບາດອອກໄປໃນວົງກວ້າງ ແລະ ແກ້ໄຂກໍລະນີທີ່ຕິດເຊື້ອໄດ້ແຕ່ຕົ້ນ ເຖິງແມ່ນວ່າທາງເສດຖະກິດ, ສັງຄົມ ໄດ້ຮັບຜົນກະທົບຢ່າງຫຼີກລຽງບໍ່ໄດ້ກໍຕາມ ແຕ່ກໍສາມາດຜ່ານພົ້ນໄປໄດ້ດ້ວຍດີ.

ມາໃນປັດຈຸບັນ ສະພາບການແຜ່ລະບາດ ຂອງພະຍາດ ຍັງບໍ່ສະຫງົບລະງັບລົງຂາດຕົວ ກັບມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ໃນຂອບເຂດທົ່ວໂລກ ແລະ ປະເທດທີ່ໃກ້ຄຽງ, ຢູ່ ສປປ ລາວ ກໍຍັງມີຄວາມສຸ່ມສ່ຽງໃນຫຼາຍດ້ານ ໂດຍໃນ ເດືອນເມສາ 2021 ນີ້ ໄດ້ເກີດກໍລະນີການນໍາເຂົ້າເຊື້ອພະຍາດ ແລະ ກໍລະນີຕົວການແຜ່ກະຈາຍເຊື້ອ ເຊິ່ງເຮັດໃຫ້ມີຜູ້ຕິດເຊື້ອເພີ່ມທະວີຂຶ້ນຫຼາຍ ພາຍໃນບໍ່ເທົ່າໃດມື້ ຈົນອົງການຈັດຕັ້ງພັກ-ລັດ ຕ້ອງໄດ້ປະກາດປິດນະຄອນຫຼວງວຽງຈັນ ກໍຄືບັນດາແຂວງ ຈຳນວນໜຶ່ງ.

ຕໍ່ສະພາບການດັ່ງກ່າວນີ້ ໄດ້ສ້າງຄວາມວິຕົກກັງວົນ ແລະ ຄວາມເປັນຫ່ວງເປັນໃຍ ຕໍ່ສະຖຽນລະພາບ ດ້ານເສດຖະກິດ, ສັງຄົມ ຂອງອົງການຈັດຕັ້ງພັກ-ລັດ ແລະ ຄວາມຕົກໃຈຢ້ານກົວ ຂອງສັງຄົມ, ປະຊາຊົນລາວບັນດາເຜົ່າ ກໍຄືພຸດທະສາສະນິກະຊົນທັງຫຼາຍ ບົນພື້ນຖານນີ້ ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ຈຶ່ງອອກຄຳສັ່ງແນະນຳມາຍັງ ຄະນະບໍລິຫານງານ ອົງການພຸດທະສາສະໜາ ສັມພັນ ແຫ່ງ ສປປ ລາວ ທຸກຂັ້ນ, ພຣະສົງ-ສາມະເນນ, ພໍ່ຂາວ-ແມ່ຂາວ, ພຸດທະສາສະນິກະຊົນລາວ ບັນດາເຜົ່າ ດັ່ງນີ້:

1. ໃຫ້ພຣະສົງ-ສາມະເນນ, ພໍ່ຂາວ-ແມ່ຂາວ ແລະ ພຸດທະສາສະນິກະຊົນລາວບັນດາເຜົ່າ ເອົາໃຈໃສ່ຈັດຕັ້ງປະຕິບັດ ຕາມຄຳສັ່ງ ຂອງນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການ ສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19 (COVID 19) ສະບັບເລກທີ 15/ນຍ, ຄັ້ງວັນທີ 21 ເມສາ 2021 ຢ່າງເຄັ່ງຄັດ,
2. ໃຫ້ຄະນະບໍລິຫານງານ ອົງການພຸດທະສາສະໜາສັມພັນ ແຫ່ງ ສປປ ລາວ ໃນແຕ່ລະຂັ້ນ ເອົາໃຈໃສ່ເປັນເຈົ້າການ ໃນການສະກັດກັ້ນ, ຄວບຄຸມ ແລະ ປ້ອງກັນພະຍາດໂຄວິດ 19 (COVID 19) ເປັນຫຼັກສໍາຄັນ ອີກອັນໜຶ່ງ,
3. ໃຫ້ຄະນະບໍລິຫານງານ ອົງການພຸດທະສາສະໜາສັມພັນ ແຫ່ງ ສປປ ລາວ ໃນແຕ່ລະຂັ້ນ ສືບຕໍ່, ຕິດຕາມ ແລະ ປະເມີດສະຖານະການ ການແຜ່ລະບາດ ຂອງພະຍາດໂຄວິດ 19 (COVID 19) ຢ່າງໃກ້ຊິດ ເພື່ອສືບຕໍ່ຈັດຕັ້ງປະຕິບັດຄຳສັ່ງ, ແຈ້ງການ ຂອງການຈັດຕັ້ງ ພັກ-ລັດ ທີ່ວາງອອກ ໃຫ້ເຂັ້ມງວດ ແລະ ມີປະສິດທິຜົນສູງ. ພ້ອມກັນນັ້ນ ກໍໃຫ້ຄົ້ນຄວ້າ, ວາງມາດຕະການຮັບມື, ແກ້ໄຂ ແລະ ຟື້ນຟູຜົນກະທົບໂດຍກົງ ຕໍ່ການດຳລົງຊີວິດປະຈຳວັນ ກໍຄືການເຄື່ອນໄຫວວຽກງານ ຂອງບຸກຄະລາກອນສົງ, ພຣະສົງ-ສາມະເນນ, ພໍ່ຂາວ-ແມ່ຂາວ ແລະ ພຸດທະສາສະນິກະຊົນລາວບັນດາເຜົ່າ,
4. ໃຫ້ຄະນະບໍລິຫານງານ ອົງການພຸດທະສາສະໜາສັມພັນ ແຫ່ງ ສປປ ລາວ ໃນແຕ່ລະຂັ້ນ, ພຣະສົງ-ສາມະເນນ, ພໍ່ຂາວ-ແມ່ຂາວ, ພຸດທະສາສະນິກະຊົນລາວບັນດາເຜົ່າ ໄດ້ເອົາໃຈໃສ່ປະກອບສ່ວນ ອຸປະຖັມທາງດ້ານເຄື່ອງມື, ສິ່ງອຳນວຍຄວາມສະດວກ ໃຫ້ແກ່ການປະຕິບັດໜ້າທີ່ພະນັກງານ, ແພດໝໍ ແລະ ບຸກຄະລາກອນອື່ນໆ ຂອງອົງການຈັດຕັ້ງັກ-ລັດ ທີ່ມີໜ້າທີ່ໂດຍກົງ ກັບການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ພະຍາດໂຄວິດ 19 (COVID 19) ໂດຍການຊ່ວຍເຫຼືອທາງດ້ານວັດຖຸ ແລະ ການໃຫ້ກໍາລັງໃຈ ຕາມສະພາບເງື່ອນໄຂ, ກໍາລັງສັດທາ ທີ່ເໝາະສົມ,
5. ໃຫ້ ພຣະສົງ-ສາມະເນນ, ພໍ່ຂາວ-ແມ່ຂາວ ແຕ່ລະວັດ ໃນຂອບເຂດທົ່ວປະເທດ ໄດ້ເອົາໃຈໃສ່ເພີ່ມຕື່ມ ໃນການສູດມົນຈະເຣີນພາວະນາ ໂດຍ ສູດຣະຕະນະສູດ, ເມຕຕາສູດ, ທະຊັຄຄະສູດ ໃນແຕ່ລະວັນ ພ້ອມກັນນັ້ນ ກໍໃຫ້ສູດ ອາຕານາຕິຍະສູດ, ມະຫາສະມະຍະສູດ, ທັມມະຈັກກັປປະວັຕຕະນະສູດ ເປັນຕົ້ນ ຕາມແຕ່ກໍລະນີ ເພື່ອນ້ອມນໍາເອົາ ພຸທທານຸພາບ, ທັມມານຸພາບ, ສັງຄານຸພາບ ແລະ ອານຸພາບແຫ່ງພຣະປະຣິດທັງຫຼາຍ ໄດ້ຊ່ວຍເປັນເຄື່ອງຮັກສາ, ຄຸ້ມຄອງປ້ອງກັນ ປະເທດຊາດບ້ານເມືອງ, ປະຊາຊົນ ໃນປະເທດ ໃນໂລກ, ຊ່ວຍຂະຈັດ ສັບພະທຸກ, ສັບພະໂສກ, ສັບພະໂຣກໄພພະຍາດທັງຫຼາຍ ໃຫ້ອັນຕະຣະທານໝົດສ້ຽງໄປ,

6. ການຈັດກິດຈະກັມ ງານວັນສຳຄັນທາງພຣະພຸດທະສາສະໜາ, ງານບຸນ, ງານປະເພນີຕ່າງໆ ທີ່ລວມມວນຊົນຈຳນວນຫຼາຍ ຂອງວັດຕ່າງໆ ຂໍໃຫ້ໂຈະໄວ້ກ່ອນ ຈົນກວ່າສະຖານະການ ການແຜ່ລະບາດພະຍາດໂຄວິດ 19 (COVID 19) ສະຫງົບລະງັບໄປ, ສັງຄົມກັບຄືນສູ່ສະພາບປົກກະຕິ ຈຶ່ງໃຫ້ຈັດຕັ້ງປະຕິບັດ ຕາມທີ່ໄດ້ເຄີຍປະຕິບັດມາ. ສຳລັບການອອກບິນທະບາດ ຕາມອະຣິຍະປະເພນີ ຂອງພຣະສົງ-ສາມະເນນ ກໍໃຫ້ຂຶ້ນກັບເງື່ອນໄຂຂອງແຕ່ລະວັດ, ວັດໃດຢູ່ໃນເງື່ອນໄຂບໍ່ສາມາດອອກບິນທະບາດ (ເຂດທີ່ມີຄວາມສຸ່ມສ່ຽງ ການແຜ່ລະບາດ ຂອງພະຍາດ) ໄດ້ ກໍບໍ່ຄວນອອກບິນທະບາດ, ວັດໃດມີເງື່ອນໄຂ (ເຂດທີ່ປອດໄພຈາກການແຜ່ລະບາດ ຂອງພະຍາດ, ເຂດທີ່ບໍ່ມີຊຸມຊົນແອອັດ, ເຂດຊົນນະບົດ) ອອກບິນທະບາດໄດ້ ກໍປະຕິບັດຕາມອະຣິຍະປະເພນີນັ້ນ ແລະ ການອອກບິນທະບາດ ກໍໃຫ້ຈັດຕັ້ງປະຕິບັດ ຕາມມາດຕະການການສະກັດກັ້ນ, ປ້ອງກັນ, ຄວບຄຸມ ຂອງການຈັດຕັ້ງພັກ-ລັດ ທີ່ວາງອອກ ຄືການໃຊ້ແມດອັດປາກອັດດັງ, ການຮັກສາໄລຍະຫ່າງ ແລະ ການລ້າງມື ເປັນຕົ້ນ,
7. ໃຫ້ຄະນະບໍລິຫານງານ ອົງການພຸດທະສາສະໜາສັມພັນ ແຫ່ງ ສປປ ລາວ ໃນແຕ່ລະຂັ້ນ ຊີ້ນຳເອົາໃຈໃສ່ບັນຫາ ໂຄສະນາ, ສຶກສາອົບຮົມ, ສ້າງຄວາມຮັບຮູ້ເຂົ້າໃຈ ແລະ ປະຕິບັດຖືກຕ້ອງ ວິທີປ້ອງກັນພະຍາດ, ເຮັດເປັນປະຈໍາໃນການດໍາລົງຊີວິດປະຈໍາວັນຢູ່ ໃນສັງຄົມຊຸມຊົນ ຄື ອັດປາກອັດດັງ, ລ້າງມື, ຮັກສາໄລຍະຫ່າງ ໂດຍ ພຣະສົງ-ສາມະເນນ, ພໍ່ຂາວ-ແມ່ຂາວ ເປັນແບບຢ່າງນໍາໜ້າ ແລະ ເປັນເຈົ້າການປ້ອງກັນ, ສະກັດກັ້ນ ແລະ ແກ້ໄຂພະຍາດ ພ້ອມກັນນັ້ນ ກໍໃຫ້ເທສະໜາອົບຮົມສັ່ງສອນ ພຸດທະສາສະນິກະຊົນ ແລະ ປະຊາຊົນລາວບັນດາເຜົ່າ ໂດຍນຳເອົາຫຼັກທັມຄໍາສັ່ງສອນ ຂອງພຣະສັມມາສັມພຸດທະເຈົ້າ ເຊັ່ນ ຫຼັກອັປປະມາທະທັມ, ຫຼັກກັລະຍານະມິຕຕະທັມ, ຫຼັກປັນຈະສີລ, ຫຼັກປັນຈະກັນລະຍານະທັມ, ຫຼັກອະຣິຍະວຸທທິທັມ 5 ປະການ, ຫຼັກອາຍຸສສະທັມ 5 ປະການ ເປັນຕົ້ນ ໃຫ້ນໍາໄປປະພຶດປະຕິບັດ ເພື່ອເກີດໝາກເກີດຜົນ ຜ່ານພົ້ນສະພາບການພະຍາດນີ້ໄປໄດ້ ເກີດຄວາມສຸກສະຖານພອນ.

ພຣະຍອດຄຳບຸນທະວີ ປະສິດທິສັກ ຫົວຫນ້າກັມມາທິການສາທາລະນູປະການ ແລະ ຜູ້ເຕົ້າໂຮມ ມູນນິທິສົງເສີມການສຶກສາສົງ ພ້ອມດ້ວຍຄະນະກຳມະການ ແລະ ສັດທາສາທຸຊົນ ຮ່ວມ ມອບຖວາຍເງິນອຸປະຖັມ ໂຄງການ ເຝິກອົບຮົມຄຣູວິປັດສະນາ ຂອງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ຈຳນວນ 83,000.0000 ກີບ ທີ່ ຫ້ອງການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ວັດທາດຫຼວງເຫນືອ ເມືອງໄຊເສດຖາ ນະຄອນຫຼວງວຽງຈັນ.

ໃນພິທີມອບຖວາຍ ພຣະຫຼັກແກ້ວ ມະຫາເຫວດ ມະເສໄນ ຮອງປະທານອົງການພຸດທະສາສະໜາສັມພັນ ແຫ່ງ ສປປ ລາວ ອົງຊີ້ນຳລວມວຽກງານເຜີຍແຜ່ສີລະທັມ ແລະ ປະຕິບັດກັມມມະຖານ ທົ່ວປະເທດ ພຣະຍອດຄຳສີທົນໄຊຍະວົງສອນ ຫົວຫນ້າກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ພ້ອມດ້ວຍ ຄະນະສົງໃຫ້ການຕ້ອນຮັບ ແລະ ຮ່ວມອະນຸໂມທະນາ.

ພຣະຍອດຄຳບຸນທະວີ ປະສິດທິສັກ ກ່າວໃນຕອນຫນຶ່ງວ່າ “ມູນນິທິນີ້ ສ້າງຕັ້ງຂຶ້ນ ເພື່ອສົ່ງເສີມການສຶກສາໃຫ້ແກ່ພຣະສົງສາມະເນນ ແລະ ເຜີຍແຜ່ສີລະທັມ ວັດທະນະທຳ ປະເພນີຂອງຊາດ ເຊິ່ງໃນປີນີ້ ນອກຈາກກມູນນິທິສົງເສີມການສຶກສາສົງ ໄດ້ຊ່ວຍເຫຼື່ອກິດຈະກຳເຝິກອົບຮົມພະນັກງານສົງ ທີ່ ວັດສີສະເກດໄປແລ້ວຮອບຫນື່ງ ການມອບຖວາຍເງິນໃຫ້ແກ່ໂຄງການນີ້ ເປັນຮອບທີ່ສອງ. “

ຫຼັງຈາກນັ້ນ ພຣະຫຼັກແກ້ວ ມະຫາເຫວດ ມະເສໄນ ໄດ້ກ່າວຂອບໃຈ ອະນຸໂມທະນາວ່າ “ຮູ້ສຶກປຶ້ມໃຈ ດິໃຈ ທີ່ມູນນິທິການສຶກສົງ ໂດຍ ການນຳຂອງພຣະຍອດຄຳບຸນທະວີ ປະສິດທິສັກ ໄດ້ນຳເງິນມາມອບຖວາຍ ເພື່ອບູຊາຄຸນຂອງຍາທ່ານໃຫຍ່ ຊາລີ ກັນຕະສີໂລ ແລະ ເພື່ອບູຊາຄຣູ ວິປັດສະນາກັມມະຖານ ຄຣູເປັນຜູ້ມີບົດບາດສຳຄັນ ເປັນຜູ້ພັດທະນາຄົນ ພັດທະນາສັງຄົມ ພັດທະນາໂລກ ການທີ່ມູນນິທິເອົາປັດໄຈ ມາຖວາຍ ຖືວ່າຖືກຫລັກ ຖືກຍອດບຸນ ມາສົ່ງເສີມ ສ້າງບຸກຄະລາກອນ ມາສ້າງຊັບພະຍາກອນຂອງຊາດ. “

ສຸດທ້າຍ ພຣະຍອດຄຳບຸນທະວີ ປະສິດທິສັກ ຍັງໄດ້ກ່າວເຊີນຊວນ ອອກຕົນຍາດໂຍມຜູ້ມີຈິດສັດທາ ຮ່ວມສົມທົບທຶນ ເຂົ້າມູນນິທິການສຶກສາສົງໃຫ້ເຂັ້ມແຂງ ແລະ ທົ່ວເຖິງເຂດຫ່າງໄກ່ຊອກຫລີກ ຍັງມີພຣະສົງສາມະເນນ ທີ່ຂາດເຂີນ ທຶນການສຶກສາ ແລະ ສິ່ງອຳນວຍຄວາມສະດວກອື່ນໆ.

ພາບ-ຂ່າວ ໂດຍ : ກັມມາທິການເຜີຍແຜ່ສີລະທຳ ແລະ ປະຕິບັດກັມມະຖານ ສູນກາງ ອພສ,​ ໜ່ວຍງານສື່ປະຊາສັມພັນ

ຝ່າຍສົງ

ກອງປະຊຸມ ເມດຕາ ເປັນປະທານກ່າວເປີດໂດຍ ພຣະຫຼັກແກ້ວສຸເມທາທິບໍດີ (ມະຫາເວດ ມະເສໄນ), ອົງຊີ້ນຳລວມວຽກກງານເຜີຍແຜ່ສີລທັມ ແລະ ປະຕິບັດກັມມະຖານ ທົ່ວປະເທດ,ຮອງປະທານ ສູນກາງອົງການພຸດທະສາສະໜາສັມພັນແຫ່ງ ສ.ປປ ລາວ ພ້ອມດ້ວຍ ພຣະຍອດຄຳ ສຸນທໍລະຍານ (ສີທົນ ໄຊຍະວົງສອນ),ຫົວໜ້າກຳມາທິການເຜີຍແຜ່ສີລະທຳ ແລະ​ ປະຕິບັດກຳມະຖານ ສູນກາງ​ ອພສ, ພຣະຍອດຄຳ ຄຳວັນ ວໍຣະເດດ ຮອງເຈົ້າຄະນະ ອພສ ນະຄອນຫຼວງ ລວມທັງ ເຈົ້າອາວາດສຳນັກປະຕິບັດທັມ,ພຣະເຖຣານຸເຖຣະ 9 ຕົວເມືອງ ພາຍໃນນະຄອນຫຼວງວຽງຈັນ ເຂົ້າຮ່ວມ

ຝ່າຍຄາລະວາດ

ປະກອບດ້ວຍ ແນວລາວສ້າງຊາດເມືອງ,ເຈົ້າເມືອງ,ນາຍບ້ານ 9 ຕົວເມືອງ ແລະ ພາກສ່ວນທີ່ກ່ຽວຂ້ອງໃນນະຄອນຫຼວງວຽງຈັນ ໃຫ້ກຽດເຂົ້າຮ່ວມ ອອກຄວາມຄິດເຫັນ ແລະ ລາຍງານ ປັນຫາ ຂໍ້ຄົງຄ້າງໃນປີທີ່ຜ່ານມາ.

ເປັນປະຈຳທຸກປີ ຫຼັງຜ່ານລະດູການອອກພັນສາ ພຣະສົງຮັບ ຖວາຍຜ້າກະຖິນນະທານແລ້ວ ເປັນຊ່ວງເວລາອັນເຫມາະເຈາະ ທີ່ພິກຂຸສົງຈະຫາເວລາປີກວິເວກປະຕິບັດທັມ ທຸດົງໄປໃນທີ່ຕ່າງໆ ຕາມ ພູເຂົາ ລຳເນົາໄພ ຄົ້ນຫາຄູບາອາຈານ ຜູ້ຊີ້ນຳ ທາງການປະຕິບັດອັນຖືກຕ້ອງ ຫຣືບໍ່ ກໍ່ເຂົ້າຮ່ວມປະຕິບັດຕາມສຳນັກປະຕິບັດທັມຕ່າງໆຕາມຄວາມເຫມາະສົມ.

-ອິງຕາມແຈ້ງການຫ້ອງວ່າການສູນກາງພັກ ຂອງລັດຖະບານ ສະບັບເລກທີ່ 282/ຫສພ, ລົງວັນທີ່ 15 ຕຸລາ 2020 ເລື່ອງ ການຈັດງານບຸນນະມັດສະການພຣະທາດຫລວງ ປະຈຳປີ 2020 ແລະ ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບ ເລກທີ່ 1132/ຫສນຍ, ລົງວັນທີ 15 ຕຸລາ 2020

ດ້ວຍຈຸດປະສົງ ແລະ ຄາດຫມາຍ 4 ປະການ ຄື

1. ເພື່ອອະນຸລັກ ແລະ ເສີມຂະຫຍາຍມູນເຊື້ອປະເພນີອັນດີງາມຂອງງານບຸນນະມັດສະການພຣະທາດຫລວງຂອງຊາວລາວກໍ່ຄືຊາວນະຄອນຫຼວງວຽງຈັນທີ່ສືບທອດກັນມາແຕ່ບູຮານນະການໃຫ້ຍືນຍົງຕະຫຼອດໄປ.
2. ເພື່ອເປັນການສ້າງແບບແຜນວິຖີວັດທະນະທຳໃຫມ່ (New Normal) ຕິດພັນການຊຸ້ກຍູ້ສົ່ງເສີມການທ່ອງທ່ຽວພາຍໃນໃຫ້ມີຄວາມເຂັ້ມແຂງ ແລະ ເພື່ອພື້ນພູຜົນກະທົບຈາກໂລກລະບາດ Covid-19
3. ຖືເອົາໂອກາດບຸນນະມັດສະການພຣະທາດຫລວງ ເຊີ່ງມີປີລະຄັ້ງ ເພື່ອເປັນການສ້າງເງື່ອນໄຂ່ໃຫ້ປະຊາຊົນລາວທັງຊາດທີ່ມີຈິດສັດທາຕໍ່ອົງພຣະທາດຫລວງທີ່ເປັນມໍລະດົກ ເປັນມິ່ງຂວັນຂອງຊາດລາວໄດ້ມາຂາບໄຫວ້ສັກກາລະບູຊາ
4. ເພື່ອຮັບປະກັນຄວາມສະຫງົບ,ຄວາມເປັນລະບຽບຮຽບຮ້ອຍ,ຄວາມສະອາດງາມຕາໃນຂອບເຂດການຈັດງານປະເພນີບຸນນະມັດສະການພຣະທາດຫລວງ.

ເຫັນດີໃຫ້ຈັດງານບຸນນະມັດສະການພຣະທາດຫລວງປະຈຳປີ 2020 ແຕ່ຈະມີຄວາມແຕກຕ່າງຈາກປີທີ່ຜ່ານມາ ຄື ໃຫ້ເນັ້ນໃສ່ທາງດ້ານຮີດຄອງປະເພນີ, ບໍ່ໃຫ້ມີງານຕະຫລາດນັດວາງສະແດງ ແລະ ຈຳຫນ່າຍສິນຄ້າ ເນື່ອງຈາກສະພາບການລະລາດຂອງພະຍາດໂຄວິດ 19.

ສຳຫລັບວັນເວລາ ບຸນນະມັດສະການພຣະທາດຫຼວງປະຈຳປີ 2020 ກຳຫນົດໃຫ້ເວລາພຽງ 3 ວັນ ຄື ນັບແຕ່ວັນທີ່ 29-31 ຕຸລາ 2020 ກົງກັບມື້ຂື້ນ 13-15 ຄ່ຳ ເດືອນ 12 ເພັງ ພສ 2563

-29 ຕຸລາ 2020 ກົງກັບ ມື້ຂຶ້ນ 13 ຄໍ່າ ເດືອນ 12 ລາວ ພສ 2563:

ຕອນເຊົ້າ 08 ໂມງ ເປັນຕົ້ນໄປ ຫ້າງຫາກະກຽມຕົກແຕ່ງ ສະຖານທີ່ດ້ານນອກ ແລະ ໃນກົມມະລຽນພຣະທາດຫລວງ ແລະ ພິທີຄອບໄຄວ່ ຢູ່ 3 ຈຸດ ຈຸດທີ່ 1 ເອີ້ນວ່າດ່ານເຂົ້າເມືອງ ຢູ່ຫນອງບອນ ແປະຫ້ອງການບ້ານຫນອງບອນ ຈຸດທີ່ 2 ຫໍນາງສີດາ ຈຸດທີ່ 3 ຈຸດສຳຄັນທີ່ສຸດ ຄອບໄຄ່ວ ຫໍປູຕາ

ຕອນແລງ 16 ໂມງ ພິທີສູດປະລິຕະມຸງຄຸນ ເປີດປະຕູພຣະທາດຫຼວງ

ຕອນແລງ 20 ໂມງ ແຫ່ຜາສາດເຜິ້ງ,ວຽນທຽນ ແລະ ຄົບງັນຕາມປະເພນີ.

-30 ຕຸລາ 2020 ກົງກັບມື້ຂຶ້ນ 14 ຄໍ່າ ເດືອນ 12 ລາວ ພສ 2563:

ເວລາ 13 ໂມງ ເຕົ້າໂຮມຜາສາດເຜີ້ງຈາກ 4 ຕົວເມືອງ ຢູ່ຫນ້າວັດຫນອງບອນ

ເວລາ 13:30 – 18:00 ເຄື່ອນຂະບວນ ພິທີແຫ່ຜາສາດເຜີ້ງ ສູ່ກົມມະລຽນພຣະທາດຫລວງ,ທັງຂະບວນແຫ່ທັງບັ້ງ,ດົນຕຣີພື້ນເມືອງ, ຫລັງຈາກນັ້ນ ຟັງທັມມະເທດສະນາ 1 ກັນ ແລ້ວ ຄົບງັນຕາມປະເພນີ.

-31 ຕຸລາ 2020 ກົງກັບມື້ຂຶ້ນ 15 ຄໍ່າ ເດືອນ 12 ລາວ ພສ 2563 :

ເວລາ 7 ໂມງ – 8 ໂມງ ພິທີໄຫວ້ພຣະຮັບສິນ, ຟັງທັມມະເທດສະໜາ,ຖວາຍສັງຄະທານ ຍາດນ້ຳ ແລະ ພິທີຕັກບາດຂອງພຣະສົງສາມເນນ ສ່ວນຮູບແບບການຕັກບາດໃນຕອນເຊົ້າ ແມ່ນໃຫ້ຈໍາກັດ ແລະ ໂດຍກໍາກັບການວາງບາດຄູບາໃຫ້ມີໄລຍະຫ່າງທີ່ເໝາະສົມ.

ເວລາ 12 ໂມງ ເຕົ້າໂຮມນັກກິລາຕີຄີຢູ່ວັດທາດຫລວງໃຕ້

ເວລາ 12:30 ພິທີອັງເຊີນລູກຄີຢູ່ຫໍເຈົ້າໄຊຍະເສດຖາທິລາດ ເຂົ້າສູ່ພຣະທາດຫລວງ ແລ້ວໆ ແຫ່ຂະລວນລູກຄີສູ່ສະຫນາມຫລວງ ແລະ ເປີດການແຂ່ງຂັນຕີຄີ

ເວລາ 19 ໂມງ ພິທີວຽນທຽນຢູ່ກົມມະລຽນພຣະທາດຫລວງ,ຈູດບັ້ງໄຟບູຊາອົງພຣະທາດ

ນອກຈາກປະເພນີຢູ່ເດີນພຣະທາດຫລວງແລ້ວຍັງມີປະເພນີທີ່ກ່ຽວຂ້ອງກັບງານບຸນພຣະທາດຫລວງ ຢູ່ສະຖານທີ່ວັດອື່ນໆ ເຊັ່ນ ວັດສີເມືອງ,ວັດອົງຕື້ ແລະ ວັດອິນແປງ

ປີນ້ີເປັນປີທີ່ພິເສດ ເປັນບາງບຸນໃຫຍ່ ແນ່ນອນມີຊຸມຊົນແອ່ອັດ ຄົນຫລາຍທ້ອງຖິ່ນ ແລະ ເນື່ອງຈາກວ່າ ພະຍາດໂຄວິດ 19 ກຳລັງແຜ່ລະບາດຢູ່ ສຳຄັນທີ່ສຸດແມ່ນພໍ່ແມ່ປະຊາຊົນຕ້ອງເປັນເຈົ້າການນຳກັນ ໃນຮັກສາ ປ້ອງກັນຕົນເອງ ກ່ອນອອກຈາກບ້ານເຮືອນໃຫ້ໃສ່ຜ້າຜິດປາກ ເມື່ອຮູ້ສຶກບໍ່ສະບາຍໃຫ້ບໍ່ຄວນອອກຈາກບ້ານ ແລະ ມີສະຕິລະວັງຕົວໃນການຫລີ້ນບຸນນະມັດສະການພຣະທາດຫລວງປີນີ້.

ສຳຫລັບປີນີ້ ໃນບໍລິເວນສະຫນາມຫລວງ ເພີ່ນບໍ່ອະນຸຍາດໃຫ້ມີຮ້ານຂາຍເຄື່ອງເພີ່ມເຕີ່ມໄປອີກ ແຕ່ຈະໃຫ້ເປັນບ່ອນຝາກລົດ ໃຫ້ພໍ່ແມ່ປະຊາຊົນໄດ້ມີບ່ອນຝາກລົດຢ່າງກວ້າງຂວາງແທນ

ຄ່າຝາກລົດ

 ລົດໃຫຍ່ 20,000 ກີບ

ສາມຫລໍ້ 15,000 ກີບ

ລົດຈັກ 10,000 ກີບ

ດາວໂຫລດອ່ານເອກກະສານຖະແຫລ່ງຂ່າວເຕັ້ມໆ